भोलि देखि दशैंको अग्रिम टिकट बुकिङ सुरु हुने, १० प्रतिशत भाडा बढ्यो
आजको खबर | प्रकाशित : २०७५ असोज ८ गते १०:३६
काठमाडौं। दशैंका लागि अग्रिम टिकट बुकिङ खुलेको छ । यातायात व्यवसायीको आज भएको बैठकले भोलि मंगलबार बिहानदेखि टिकट बुकिङ सुरु गर्ने निर्णय गरेको हो । यसअघि भाडादरमा समायोजन तथा यातायात व्यवसायी समितिको बैंक खाता रोक्का भएका कारण व्यवसायीले टिकट बुकिङ खोलेका थिएनन् ।
सरकारले भाडादरमा १० प्रतिशत वृद्धि गर्ने र यातायात व्यवसायी समितिका रोक्का भएका खाता खोल्ने निर्णय गरेसँगै व्यवसायीले टिकट बुकिङ खोल्ने निर्णय गरेका हुन् । नेपाल यातायात व्यवसायी महासंघको बैठकले भोलि ९ गतेबाटै अग्रिम टिकट बुकिङ खुला गर्ने निर्णय गरेको हो । यसअघि ५ गतेबाट गर्ने भनिएको टिकट बुकिङ इन्धनको मूल्यवृद्धिको विरोध गर्दै व्यवसायीहरुले रोकेका थिए । सरकारले १० प्रतिशत गाडीभाडा बढाएपछि महासंघको बैठक बसेर टिकट बुकिङ खुला गर्ने निर्णय गरेको हो ।
पेट्रोलियम पदार्थमा भएको मूल्यवृद्धि अनुरुप सार्वजनिक यातायातको भाडादर समायोजन भएपछि अग्रिम टिकट बुकिङ खुला गर्न निर्णय भएको नेपाल यातायात व्यवसायी राष्ट्रिय महासंघका महासचिव सरोज सिटौलाले जानकारी दिए । बढाइएको १० प्रतिशत भाडा अनुसार यातायात व्यवस्था विभागले आइतबार देशभरका विभिन्न रुटको नयाँ भाडादर सार्वजनिक गरेको थियो ।