एशिया कप छनोटः सिंगापुरमाथि नेपालको जित
काठमाडौं। एशियाकप छनोटअन्तर्गतको आफ्नो चौथो खेलमा नेपाल ४ विकेटले विजयी भएको छ । सिंगापुरले दिएको १५२ रनको लक्ष्य नेपालले २८ ओभर १ बलमा ६ विकेटको क्षतिमा भेट्टायो । यसअघि सिंगापुरले ४२ ओभरमा अलआउट हुँदै १५१ रन बनाएको थियो ।
सिंगापुरका लागि चेतन सूर्यवंशीले ६०, अनिश परामले ३१ र कार्तिकेयन सुब्रमन्यनले २० रन बनाए । अन्य ब्याट्सम्यानले भने दोहोरो अंकामा पनि रन बनाउन सकेनन् । नेपालको लागि सन्दिप लामिछाने र ललित नारायण राजवंशीले समान ३ विकेट लिए । सोमपाल कामीले २ र बसन्त रेग्मीले १ विकेट लिए ।
लक्ष्य पच्छ्याने क्रममा नेपालका लागि अनिल शाहले सर्वाधिक ४३ रन बनाए । दिपेन्द्र सिंह ऐरीले २२, ज्ञानेन्द्र मल्लले २९ सागर पुन र सुवास खकुरेलले समान १४ तथा कप्तान पारस खड्काले ११ रन बनाए । नेपालको लागि अन्तिम विजयी चौका भने आरिफ शेखले हानेका थिए । आरिफले त्यही अन्तिम बलमात्र खेलेका थिए ।
