३२ अर्बमा चिनियाँ गाई
आजको खबर | प्रकाशित : २०७५ कार्तिक १४ गते २:३६

पोखरा। गण्डकीसहितका तीन प्रदेशमा ३२ अर्बको लगानीमा मोडेल गाई फार्म स्थापनाको तयारी गरिएको छ। चीन सरकारको सहयोगमा गण्डकीका साथै प्रदेश २ र प्रदेश ३ मा फार्म खोल्न लागिएको हो।
त्यसका लागि संघ सरकारले स्वीकृत दिइसकेको छ। प्रदेश सरकारले गाईपालनका लागि आवश्यक प्रक्रिया पूरा भएको भन्दै सहयोगका लागि चीनसँग सम्झौता गर्न पत्राचार गरिसकेको छ। वैदेशिक सहयोग भित्र्याउन संघ सरकारबाट अनिवार्य स्वीकृति लिनुपर्ने संवैधानिक व्यवस्था छ।
गण्डकीका भूमि व्यवस्था, कृषि तथा सहकारीमन्त्री लेखबहादुर थापा मगरले दूध तथा दुग्धजन्य पदार्थको ‘हब’ बनाएर प्रदेशलाई आत्मनिर्भर बनाउने योजनाअनुसार मोडेल फार्म सञ्चालन गर्न लागिएको जनाए। फार्म प्रदेश दुग्ध विकास बोर्डमार्फत सञ्चालन हुनेछ। बोर्ड गठनका लागि बनाएको विधेयक प्रदेशसभाबाट पारित भइसकेको छ।आजको कान्तिपुर दैनिकबाट
२०७५ कार्तिक १४ गते २:३६ मा प्रकाशित