चौध वर्षदेखि फरार अभियुक्त पक्राउ
आजको खबर | प्रकाशित : २०७५ पुष २३ गते १६:५३
वालिङ । कर्तव्य ज्यान मुद्दाका अभियुक्तलाई जिल्ला प्रहरी कार्यालय स्याङ्जाले पक्राउ गरेको छ । जिल्ला प्रहरी कार्यालय स्याङ्जाका प्रवक्ता विजयकुमार सिंहका अनुसार २०६१ साल कात्तिकमा साबिकको तुल्सीभञ्ज्याङ–१ सिजाखर्कका सोमबहादुर रानालाई आक्रमण गरेका सोही ठाउँका ठगबहादुर राना भन्ने थमनबहादुर राना मगरलाई पक्राउ गरिएको हो ।
ठगबहादुरले साइकलको चेन, लाठी, दाउराले आक्रमण गर्दा गम्भीर घाइते भएका सोमबहादुरलाई उपचारका लागि पाल्पास्थित मिसन अस्पताल लैजाँदै गर्दा बाटोमै मृत्यु भएको थियो ।
सोमबहादुरको मृत्युपश्चात् फरार रहेका ठगबहादुरलाई रुपन्देहीको तिलोत्तमा नगरपालिका–७ सेमरामा लुकिछिपी बसेको अवस्थामा पक्राउ गरी स्याङ्जा जिल्ला अदालतबाट म्याद थप गरी अनुसन्धान भइरहेको छ ।
२०७५ पुष २३ गते १६:५३ मा प्रकाशित